Assembly House-a Chief Minister chet dan kha kan dem takzet- MNYF

by News Editor

Tualchhung News

ZORAM TODAY| 24th August, 2024 (Sat): MNF Ṭhalai chuan vawiin khan thuchhuah siamin, tunhnai Assembly Session a Chief Minister Lalduhoma’n an President leh MLA nibawk, Robert Romawia Royte te chhungkuain Pathian ram thawhlawm an thawh chungchang a sawichhuah duh dan leh Kohhran Committee hial pawh dawt muhluma a puh dan kha Kristian pangngai rilru atanga chhuak nitheiah kan ngai lo, tiin an tarlang.

MNYF chuan, “Kan Chief Minister zahawm tak hi Setana’n a bawih hneh hle tih alang,” an ti.

MNYF chuan, "Kan President, MLA Robert Romawia Royte te chhungkua hi thlahtute atanga Pathian tih leh midangte tana malsawmna ni thin an ni tih hrechiangtu chu Chief Minister Lalduhoma hi a ni a,” an ti a.

Kum 2014 a MP Election atana Robert Romawia Royte a campaign pui lai pawh khan Pathian ram thawhlawm leh mithiam bik a nihna hi Lalduhoma’n a fakna point ber niin a sawi uar thin hle bawk, an ti.

MNYF President leh MLA nibawk Robert Romawia Royte hian Peace Bonus leh Hmeichhe Footballer chungchangah Lalduhoma dawt sawi alo lepse tawh, an ti a. “Lalduhoma hian Assembly House meuhah Robert Romawia Royte hi ngaihdam a dil tawh a nih kha” an ti bawk.

Tunhnaia CM Lalduhoma’n Assembly Session-a Robert Romawia Royte mimal taka a beih dan kha kan ngai thutakin demawm kan ti takzet a ni, MNYF Hqrs chuan an ti a.

MNYF thuchhuah chuan, “CM Lalduhoma hian kan President, Robert Romawia Royte hi mimal taka a bei leh a nih chuan MNYF te chuan kan tihtur kan ti ve nghal chat chat zel tawh dawn a ni,” an ti.